Abarwayi ba mbere mu Rwanda batangiye kubagwa umutima n’ibitaro byitiriwe Umwami Faisal

Ibitaro byitiriwe Umwami Faisal byatangije gahunda idasanzwe yo kubaga abarwaye umutima ku nshuro ya mbere mu Rwanda bikozwe n’Abanyarwanda mu gihe byari bisanzwe bikorwa n’inzobere z’abaganga b’abanyamahanga.

Ni igikorwa kizasiga habazwe abarwayi babikeneye kurusha abandi bari hagati y’umunani na 11, hagati yo ku wa 10-17 Gashyantare 2020, kiyobowe n’umuganga w’inzobere w’Umunyarwanda, Dr Musoni Maurice.

Ibi bitaro bimaze imyaka isaga 1o bitanga ubuvuzi bwo kuvura bisanzwe no kubaga imitima bikorwa n’amatsinda y’abaganga baturutse mu mahanga, akaza inshuro imwe mu mwaka.

Umuyobozi w’Ibitaro byitiriwe Umwami Faisal, Dr Kalimba Edgar, yavuze ko ku bufatanye na Minisiteri y’Ubuzima, Ikigo cy’Igihugu cy’Ubwiteganyirize mu Rwanda n’itsinda ry’inzobere z’abaganga bavura umutima bo muri Amerika, Team Heart, bashyizeho uburyo abaganga b’Abanyarwanda bashobora kuwibagira nabo.

Ati “Igitandukanye muri uyu mwaka ni uko bwa mbere mu mateka yacu dufite umuganga w’Umunyarwanda, Dr Musoni Maurice w’inzobere mu kubaga imitima. Ni byo byaduhaye amahirwe yo gutangiza gahunda ihoraho buri gihe atari ukubaga rimwe mu mwaka.”

Dr Musoni yasoje amasomo yo kubaga umutima muri Kanama umwaka ushize, ibyo bitaro asanzwe akoramo bihita bishyiraho gahunda izatuma abarwayi bakeneye kubagwa umutima babikorerwa batarinze gutegereza inshuro imwe mu mwaka nk’uko byari bisanzwe.

Abaganga ba Team Heart bazakomeza kuba hafi ab’ibitaro byitiriwe Umwami Faisal babaha ubwunganizi n’ubujyanama igihe babaga abo barwayi.

Kuva ku wa 10 Gashyantare 2020 hamaze kubagwa abarwayi bane kuko buri munsi habagwa umwe.

Indwara y’umutima babaga ni ifata uduce dutandukanya ibyumba by’umutima tudafunguka neza mu gihe amaraso ava mu gice kimwe ajya mu kindi, bigatuma urwo rugendo rwayo rudakorwa neza akaba yakwireka cyangwa ntagende uko bikwiye.

Ni indwara ikunze gufata cyane cyane abari mu cyiciro cy’imyaka itatu na 15 iturutse ku ndwara zifata mu mihogo, yamira akababara.

Dr Musoni ati “Kugeza ubu tumaze kubaga abarwayi bane kandi bose atari n’indwara zoroheje kandi barishimye nta kibazo bafite.”

Niyobuhungiro Emmanuel uri mu babazwe umutima na Dr Musoni yavuze ko yumva nta kibazo afite kandi afite icyizere ko nyuma y’iminsi mike azataha.

Kubaga umuryayi umwe bisaba amadolari ya Amerika ari hagati y’ibihumbi umunani na 11 ariko iyo avuriwe hanze ikiguzi cyikuba inshuro nibura ebyiri. Gusa mu rwego rwo korohereza abakeneye ubu buvuzi, buhabwa n’abafite ubwishingizi bw’ubuzima burimo na Mituweli.

Umwe mu bashinze Team Heart, Dr. Chip Bolman, yavuze ko guhera mu 2008 iri tsinda ryakoze ibikorwa bitandukanye birimo kuvura no guhugura abaganga b’Abanyarwanda ibijyanye no kubaga umutima mu rwego rwo gufasha umubare munini wajyaga gushaka ubwo buvuzi mu mahanga.

Ibitaro byitiriwe Umwami Faisal bigaragaza ko bifite bifite abarwayi barenga 1,000 bakeneye kubagwa ariko bifite intego yo kuzajya bigaba nibura batatu buri cyumweru. Umwaka ushize gusa ibi bitaro byabaze abarenga 500.

Ibi bitaro bimaze imyaka isaga 30 bitanga serivisi z’ubuvuzi mu Rwanda. Mu 2013 byashyizwe ku rwego rw’akarere, bikaba byitezwe ko muri Werurwe uyu mwaka hazakorwa irindi genzura, hakarebwa niba bikiruriho.

https://igihe.com/ubuzima/article/abarwayi-ba-mbere-mu-rwanda-batangiye-kubagwa-umutima-n-ibitaro-byitiriwe